மணல்.....

மணல்
--------------------


கழிஞ்ச வாரம்
வெல கேட்டேன் – நூறு பெருக்கும்
இருவதாயிரம்ணு சொன்னாரு
வீசை கண்ட்றாக்கு....


ரெண்டு நாள் கழிஞ்சா
புதிய லோடு வரும் – வெல
கூடுனா நான் பளியில்லைணு
கணேசன் அண்ணன்....


இவனுவோ ஏமாத்து மோலாளி
வேற கெளக்க பாப்போம் - இது
சேமக்கண்ணு காக்கா...


நாளு வேற இல்லடா
திங்கிளாச்ச வார்ப்பு – கொத்தன்
சென்னா கேப்பான் ஆனா
வார்ப்புகாறன் நிக்கமாட்டான்
அவ்வகரு உப்பா பறஞ்சிது...


கலப்படம் இல்லாம
இருக்கணம் மோலாளி - இல்லண்ணா
சாந்து கோர முடியாது
பாக்கியநாதன் பேடி காட்டினார்....


நீங்கோ ராஜன்ட சொல்லுங்கோ
வலிய லோடு ஃபுள்ளா இரிக்கும் - கொஞ்சம்
ஈரமா இருந்தாலும்
நியாயமா கொண்டுவருவான்
சொன்னது ராமையன்....


சிமண்ட்தெவயுமா குட்டியாப்பா
பெறவு தத்துர நேரத்துல
ஓட முடியாது – முன்னறிவிப்போடு
பேரன் மம்மது சாதுக்கும்.....


தேச்சியம் வருது எனக்கு
தேடுவது ஒண்ணு இவன்
செல்லுயது ஒண்ணு - கொஞ்சம்
சுடு தண்ணி கேட்டது உப்பா.....


இப்படியாய் எழிதில்
கிடைக்கும் எனும் ஒரு
நிச்சயமில்லாத நிலையில்
ஆற்று மணல் சேற்று மணலாய்....

அலை பேசிகளிலும் தொலை பேசிகளிலும்
விலை பேச வைத்தது வெறும்
விலையற்றதாய் பாற்கப்பட்ட
காட்டாற்றின் மண் படுகைகள்.....


தாமிர பரணியில் தடையாம்
பாலாற்றிற்கு இல்லை – காவிரி
மண்ணைக் கொணர்வதே இல்லையாம்
தண்ணீரையும்தான்....


கடல் செல்லும் நீரை
தேக்க மனமில்லை – நிலம்
சொல்லும் கதையை கேட்கவும்
பொறுமையில்லை....

மண் கரைந்தொழுகும் ஆற்றில்
மனிதர்களும் இல்லை - சிலர்
மிருகங்களாய் அங்கு
இல்லாமலுமில்லை...

நதிகளின் கால் சுவடுகளில்
ஆங்காங்கே ஆழமான காயங்கள் - ஆயுதம்
கொண்டு குத்தி கிழிக்கப்படும்
ஆற்றின் வயிறுகள்....

ஓலமிடுகின்றன நதிகள்
எமை வாழ விடுங்கள் - யாம்
சுமந்து வந்த மணற்பருக்கைகள்
எமக்கே வேண்டும் எம் கால்
பதித்து நடனமாடவேண்டும்....

நேற்றைய நித்திரைகள்
மீண்டும் வேண்டும் - பிஞ்சுக்
கால்கள் உதைத்த எம்
வயிற்றில் பேய்த்தனமாய்
ஜே சி பி க்கள் வேண்டாம்......

மனுடமே கொஞ்சம்
மனிதம் கொள் - இயற்கையில்
எமை யாவது மீதம் கொள்.....


அன்புடன்

அபூ ஃபஹத்