திரை கடலோடிய
நீண்ட பயணங்களில்
திரவியங்கள் இருந்தனவாம்
திரைகளில் மறந்துபோன
அனுபவங்கள்....
வான வெளியில்
சில மணி நேரங்களாய்
சுருங்கிப்போயிருக்கிறது
பல கடல் கடந்த தூரங்கள்.....
நேற்று தோல் பெட்டகங்களில்
நிறைக்கப்பட்டது விதேச
பண்டங்கள் - இன்று
அட்டைப்பெட்டிகளாய்
பயணப்படுகிறது நம்மோடு....
அன்று அத்தறும் அத்தோடு
கொஞ்சம் அன்பும் கலந்திருக்கும் - இன்று
தாலியும் கூடவே தலைவலி மருந்தும்
பயணத்தின் மாற்றங்கள்....
நேற்றைய பயணங்களை
முதலாளிகள் தீர்மானிக்கவேண்டும்
இன்றைய பயணங்கள்
முதலாளியை தீர்மானிக்கின்றன....
சிறகடித்துப்பயணப்படும்
சிட்டுக்குருவிகளைப்போல்
கொஞ்சம் குதூகலிக்கிறேன் நான்
ஒவ்வொரு முறை பயணப்படும்போதும்....
வெற்றுக் கால்களை மண்தரைகளில்
பதிப்பதே இல்லை - காலணிகள்
மனிதம் கடந்து மதிக்கப்பட்டபின்.....
நிழல் பார்த்து நேரம் குறித்த
காலங்களும் பயணங்களும்
இப்போது கடிகார முட்களில்
தவறாமலுமில்லை....
இரவுகளை கடந்து
பகல்களை துரத்தி தூரத்தை
கடந்து பயணித்தபோது
பயமென்பதே இல்லை - இன்று
இரும்புப்பெட்டிகளில்
பாதுகாப்போடு பயணங்கள்...
இலக்குகளை தீர்மானித்து
இலட்சியங்களை அடைந்தன
அன்றைய பயணங்கள் - இலக்குகளை
மறந்து இலட்சியமற்ற
பயணங்கள் இன்று...
இரைச்சலும் எரிச்சலுமில்லாத
அமைதியான பயணங்களை
உணரவே முடியவில்லை - சில பல
காரணங்களற்ற சஞ்சாரங்களில்....
மனம் கொதிக்கிறது
ஒரு அழகிய பயணம் தேடி.....
No comments:
Post a Comment
படித்துவிட்டு சில வார்த்தைகளை இங்கே தூவிச்செல்லுங்கள்...